您好，歡迎來到HopeTrip旅行網！
| 優點： | 都還不錯 |
|---|---|
| 不足： | 暫時沒有發現不足 |
| 享用心得： | 作為湛江八景之一，觀海長廊其實都幾值得去嘅。喺湛江地區，湛江市嘅規劃都算“湛江特色”啦！兩個市中心，中間仲隔成廿幾公裏，你話幾有湛江特色。 喺湛江，幾乎樣樣嘢都有兩樣，例如WAL-MART,McDonald,KFC,rbt,Watsons全部都係霞山有，赤坎就一定會有。觀海長廊都唔例外，喺霞山有“霞山觀海長廊”而喺赤坎就有“金沙灣觀海長廊”。 我哋先睇下霞山嗰個先。阿Me我作為一個土生不土長嘅湛江霞山人，對霞山呢條觀海長廊都幾熟悉嘅。從南（東南？）開始，首先係“麻斜渡口”嗰度可以“車渡”到麻斜亦係Me嘅PaPa同Uncle嘅鴿場所在地;除此之外仲有到“特呈島”同“南三島”嘅艇仔。對住個海，向左行，入“海濱公園”直行。先係一個（荒廢？）燒烤場，跟住係阿Me我嘅童年至愛，（低B）兒童樂園（深山出嘅可以玩下，如果仲存在。）再過係公園廣場（出大門嘅話就係一個叫時代廣場嘅廣場仔，曾經係公園售票處現為“紅咀鷗”觀光遊艇售票處，遲下我會補充上去），公園廣場平時無麼睇頭，得舊雕像。早上得D阿公同阿婆跳健身操或者唱下懷舊金曲，但係節假日節就會變成五彩繽紛嘅花園，有時仲有表演睇。再繼續行，左邊條路到海水泳場，同GrandBuy湛江鑫海名店（樓上為新華書店湛江書城，樓下有間Do右邊條路就直通觀海長廊，但係入長廊前，阿Me我想各位留意下右手邊嘅人工湖，嗰度有個月亮島亦即係湛府春節同國慶煙花滙演嘅地方。 出咗公園，先係一個大陸各大屋邨必備嘅康體設施，前少少係一間公廁。左手邊係交警大樓，沿著左手邊條路行，又可以到上文提及嘅嗰間GrandBuy，沿途仲會有間“西海岸西餐廳”（20+保齢球場樓上）有間“波波熊”冰店。 繼續講返觀海長廊，先會到第一個廣場，係佢對開嘅海岸度有個好多海豚嘅雕像，我哋亦正式進入觀海長廊，順便提下，呢個廣場背海方向行可以到湛江旅遊公司，仲有間國旅，如果實在唔知湛江有麼玩，嗰度有D一日遊咁嘅團。食嘅話有間“大禾壽司”，不過我去嚫都食唔到想食嘅嘢，除此之外仲有間“加州陽光”西餐廳。想食翻D有湛江風味嘅嘢有間大排檔（沿途仲會有幾間，推薦夜晚九點之後先過來食，叫幾蝶小炒，兩打燒蠔，配上杯冰爽嘅“珠江”牌啤酒或者“威力神”牌保健酒，享受下迎面吹來嘅海風，真係嘆啊。）唔可以唔提嘅系呢度嘅呢間“龜老闆”涼茶鋪，佢嘅茯苓膏好正嘠（夜晚仲有糖水食，阿Me我強力推薦食糖水嗰陣嗌多隻茶葉蛋同粽）。呢度有間“海景市場”不過D衞生同香港比起就… 繼續前行，沿途欣賞美麗嘅海景（紅樹林？）望下對岸嘅軍警碼頭，仲有條海灣大橋。值得一提嘅係觀海長廊嘅“米田共”（海螺）廣場。當聞到濃郁嘅氣味時，你就到達酒吧街啦！呢區最大嗰間應該係“黃金時代”。附近都會有大排檔。再向前就係“海上城市”，佢係湛府高價從深圳買翻來嘅遊輪，Now，佢被廣大湛江市民稱為“賊船”上船同船入面麼都要錢，所以…見仁見智啦！呢度附近都有幾檔大排檔嘠。 過咗部賊船就到咗“漁港公園”，無記錯嘅話，大家可以喺各大搜索引擎度查找到相關信息，不過，呢D信息就…到咗漁港公園，先會見到舊巨型石雕-海之戀，聽下個名幾令人神往，“海角七號”？發下夢好啦，改革開放就有你份。隔離係隻鍾樓仔，不過個整點報時…再入D會有座燈塔，沿途留心D你仲會見到幾隻石狗。差D唔記得咗個旱地音樂噴泉，但提下各位湛江佬D藝術造詣真係唔係咁高。食嗰方面公園度有“自由港”，再唔係部“賊船”都得。 關於住宿，“漁港公園”隔離就係“海濱賓館”四星，入面環境都唔錯。順便一提湛江嘅治安唔係好好，仲有就系留意下D孔明燈同煙花！好危險！ 相比霞山觀海長廊，赤坎金沙灣嗰個就冷清得多啦！ 地處開發區赤坎段，赤坎觀海長廊因臨近樓盤“金沙灣”（前一排無水救火嗰個），故又名“金沙灣觀海長廊”因為冷清，所以景色會好少少，同時又引咗好多學車嘅人過來。 觀海長廊背海方向係“湛江國際會展中心”，雖然話係“國際會展”其實主要作用係租出去做跳蚤市場，而賣嘅嘢… 會展往霞山方向係湛江電視臺，而我相信呢個將會係湛江市內恐怖分子嘅第一個目標。點解？你係湛江睇下“無線”同“亞視”就知啦！ |
