《4個小生去旅行》記者會 謝賢怒打曾江誤中胡楓

曾江、謝賢（四哥）、胡楓（修哥）及Joe Junior拍攝無綫真人騷節目《4個小生去旅行》，當年被視為曾江頭號死敵嘅四哥，早前在記者會上兩人已火星撞地球，更預告拍攝時大打出手都唔奇，網民紛紛留名話等睇「血戰」，亦有人話曾江係麻煩友，四人於莫斯科及聖彼德堡16日拍攝之旅，定必「出事」。

今日舉行記者會，原本四位主角好開心，仲跟大會安排的俄羅斯舞蹈員跳舞，不過跳到一半，四哥即開始面露不悅，並先行落台。之後，大會安排神秘環節為謝賢補祝生日，謝賢都仲笑笑口，其餘三個小生更為他唱生日歌。

之後四人齊齊在台下受訪，輪到謝賢發言時，他表示：「唔好畀我講，我講會講唔好嘅嘢。」此時，現場即DEAD咗AIR，其餘三人即鬥講難忘事件打圓場。之後記者追問謝賢因咩事唔開心，他表示要等無綫高層及贊助商離開後才發言。

相關人士離開後，四人再一起受訪，謝賢即嚟料：「本來係一件好開心嘅事，但係就有一個跛嘅（指曾江），都唔緊要，你跛我哋可以照顧，但估唔到佢兩、三日（後）就要坐輪椅，由頭坐到尾，感覺好似玩弄我哋。尋日仲聽到你（曾江）話流四個鐘鼻血。」之後即激動爆粗：「X你老X，你死得未？咁你唔死？」曾江此時即搭嗲：「未死得，打針停咗（血）！」之後謝賢再寸曾江「好活躍」，並謂：「我知道你個人，多過其他人知道。」

謝賢說畢，即企起身，並再度連環爆粗謂：「X你老X」，並似乎想企圖掌摑曾江，而坐在中間嘅胡楓即起身幫手勸交，期間與謝賢發生肢體推撞，胡楓眼鏡都飛甩埋，而謝賢則依然繼續狂鬧兼爆粗。內容大致指曾江昨日完成配音工作後，言談間有頂撞謝賢，令謝賢大感不滿。

最後，謝賢說了句：「成班人都畀你烚，但我唔會畀你烚。」跟著便拂抽離開現場，等車期間，繼續一輪嘴發表對曾江的不滿。

完整視頻

曾江指同謝賢誤會深

曾江事後受訪時全程笑笑口，問到是否與謝賢有誤會，他說：「誤會咗好多年，大家有時都會衝動，都幾十年。（你知唔知佢唔開心？）老實講，點知呀，我都會黑口黑面，咁多年唔會責怪佢。（佢郁手？）都唔知佢咩事，其實佢一嚟到已唔開心，問題係唔開心咗幾耐。（四哥話你寸佢阻住收工）我哋成日都互窒架啦，唔知佢唔過癮喎，節目梗係要窒嚇啦，唔係有乜意思，睇出嚟會真啲，有啲親切感，上一集佢哋都互窒。（但今次窒出火？）火睇嚇幾時出啦。（打番畀佢？）我唔會主動咁做，無需要。（嬲？）我個樣有無呀？（個心呢？）我感覺喺曬塊面度，我唔做假嘢。（影響關係？）我對佢冇問題，關鍵唔係我。（冇無試過郁手？）冇試過，拗撬幾十年唔止一次，今次佢衝動咗啲。（佢話你咋病？）我都想，你估病好過癮咩。但今次係對大家嘅友情同關註多咗，互相照顧，如果我冇病，只不過係四個人開心旅行，但有咗病嘅經歷，加咗啲嘢落去。（加咗啲咩？）睇個節目就知。佢頭先講到好唔願意推我個輪椅，但個節目入面唔係咁，佢好願意照顧我。」曾江更強調流四個鐘鼻血有醫生紙證明，絕非造假。

和事老胡楓受訪問，被問到知否二人不和，他說：「現場睇一啲都冇嬲。（係咪不滿曾江詐病？）講笑咁講啫，佢哋不知幾好傾，最多嘢傾係佢哋，不時飲住酒傾。（係咪有心結？）唔知，但搵著我嚟搞。（佢係咪打到你？）打我唔緊要，唔好打我副眼鏡嘛。」說畢，更搞笑地將眼鏡歪歪斜斜放在面上，讓記者拍照，十分搞笑。問到胡楓會否致電謝賢，他說：「叫佢賠（眼鏡）？等佢嚇咗啖火先啦。」問到之前有冇試過勸交，胡楓停了停、想了想謂：「電影入面就有。」

謝賢轟曾江 坐輪椅坐到收工

四哥發火後，怒氣沖沖離場，未有回應傳媒。四哥接受電話訪問時，劈頭就說：「打佢好出奇咩？我都未打過人？」記者問打完人洩了忿是否心情變好了，他說：「我梗係要打佢啦，你哋見過我咁嬲未？我做咗幾廿年戲都未試過咁嬲吖！」他或：「頂住度氣，諗住今日記者會落你面，結果去到嚇死我，原來好多高層喺度，結果我梗係唔會做啲咁戇居嘢，等佢哋走咗，我同記者講，我預備兜心打佢，阿修喺中間攔住我，我打佢一巴就算，我心都唔安落唔願意㗎，跟住走咗。」

至於點解要打曾江？四哥就話:「好長篇，如果要寫，全部寫出嚟，因為有今日嘅《4個小生》，我落咗好多功夫先拍到，拍完《三個小生》，過咗年幾，無綫叫我再拍一部，叫我一個人去做，我話搵番阿修(胡楓)、Joe Junior，仲有要搵番同一個導演同一個攝製隊，我話咁先做，無綫話三個冇新意，我話加多一個，四個小生囉，結果變咗《4個小生》出嚟。」

那曾江是否四哥提議找的？四哥表示：「唔係我提議，佢哋搵。曾江咪曾江囉，雖然好耐冇見，冇乜所謂，拍喇，大家一直好開心，佢又話流鼻血又痛風又呢又路，結果梗係請醫生睇，叫我哋成班人上去問候佢。

「上到佢房，真係流鼻血，但鼻血印曬人哋酒店張被度，我X你老味，有冇搞錯呀，失禮死人啦，點可能將鼻血印落去？呢樣係我心諗，但我冇話佢，我仲同佢玩㖭。

「到第二日開工，佢叫無綫畀輪椅佢坐，OK，佢啱啱痛風，隻腳唔行得，又流鼻血又呢又路，結果坐咗兩個禮拜，坐到收工嗰日。日日朝早九點叫人推佢落去食早餐上車，但推佢嗰個人，唔係請嚟推佢，係做資料搜集嘅男仔，男仔推咗佢十幾日，機票問題早走咗，總之佢由開工到尾都坐輪椅，餵！大佬呀，我哋知嘅，我哋同佢一齊，腳痛係咪要痛24小時先？由朝早九點痛到夜晚十點，可唔可以平路出嚟行嚇？」

《4個小生去旅行》截圖

四哥續謂:「餵，結果一開工，X你老味，我哋三條友喺後面跟住佢，有時我推佢，有時Joe Junior推，阿修(胡楓)冇推過，佢挑通眼眉知道啲嘢。我都唔緊要，但佢(曾江)唔可以坐足，可唔可以落車行嚇，佢有落車，但一拍完上番去，X你老味，我心知肚明，我喺嗰度一啲脾氣冇發，冇人睇到我唔開心。

「到噚日返嚟睇報紙，X佢老味，原來佢話流鼻血流咗四個鐘，你老味，4個鐘死咗啦！啱唔啱先？流血流四個鐘頭唔死，講咁大鑊想人同情你吖？人哋有腦嘅嘛！呢啲諗住返嚟唔同記者講，X你老味！」

「噚日配音，你知我兩年幾冇配音，而且我錄音好渣，成日姨姨er er，你估佢喺側邊講乜？『我諗住今日早啲返屋企㖭，錄到依家！』我忍住，唔緊要，講完佢老x企喺身，喺我哋後面行嚟行去，佢老味，我諗住錄完呢句，企喺身打佢。咬實牙筋錄埋，因為嗰度係無綫地方，費事出事，搞到無綫唔好睇，咁我走先，佢仲厚面皮到：『四哥，車埋我！』我車佢老母，我怕佢乜，佢再講一次，我話唔X車，X你老味，佢話順路都唔肯車，我就係咁講，結果我車Joe Junior，哈哈哈！」

曾江冇諗過追究 等謝賢打電話道歉

事後記者致電曾江，未有不開心的他表示無事，亦不會追究，被問有否因謝賢的指摘令他不開心？他說：「有咩唔開心啫！我哋無嘢喎！（識佢咁耐知佢為人？）佢係咁架啦，無事喎！（嬲佢？）無嬲過！可能係我過份咗，佢又過份咗啫！（有無諗住反擊？）做咩要咁做！我哋都無嘢！」

記者於片中見到謝賢的確有傷及曾江，曾江謂當時場面混亂，無感覺到對方傷及他，問到會否報警求助？他說：「黐線！點解要咁做？（會再合作？）梗係會啦！（下次見到佢握手言和？）呢啲嘢都唔會公開啦，要做頭先都做咗，係要做都私下做！」他又笑笑口謂對方未打電話向他道歉，笑言正等待對方打給他。

問佢係咪同TVB夾宣傳？曾江話：「梗係唔係啦，點會呀。」拍嘢期間拍得唔開心咩？佢話：「唔係呀，好開心喎，佢份人係咁架啦，我冇怪佢。」以前同四哥拍戲有冇試過嘈交？佢表示：「咁又未試過喎，冇事嘅冇事嘅。」四哥之後有冇打番比你？曾江：「咁又未喎，佢應該會打嘅，冇事嘅，放心。」

至於今次事件會否影響朋友關係？曾江表示:「我對佢仲係冇問題，我冇問題，問題嘅關鍵唔係喺我度，佢有冇問題我亦唔會理會。」四哥眾目睽睽下掌摑曾江，問曾江可是第一次郁手？他謂:「未試過，嗌交就可以講幾廿年唔係一兩次，(今次咁嚴重？)今次我覺得佢係衝動啲，OK喇。」

對於四哥開咪指曾江拍攝期間詐病？曾江當時與之對質期間，已連聲否認；之後受訪時，曾江重申:「我都想詐病，你估病好過癮咩？我覺得呢次個病，對大家嘅友情、對大家嘅關註、大家喺一個陌生地方裡面互相關註，照顧大家，喺好多地方度出現。如果我冇病，只係幾個小生好開心去旅行；但係經過我個病之後，除咗開心之外，亦都覺得加咗啲嘢落去，你睇咗就知。」

「雖然佢頭先話唔係咁願意用輪椅推我(曾江稱因痛風癥需靠輪椅代步)，但係你睇片係絕對感覺唔到，佢係好願意推我、好願意照顧我。老實講，我係有醫生紙證明，我想要呢隻藥，所以拎咗診斷嘅醫生紙，但係呢隻藥係得蘇聯先有。」

《4個小生去旅行》截圖

四哥連爆7次「我X你老母」：歡迎佢追究

噚日錄音俾曾江窒一窒，加上之前拍攝時的積怨，令四哥謝賢怒火難下，本來錄音時已經想起身打曾江，但礙於那是無綫地方，不想鬧事，「搞到無綫唔好睇」，故忍到今日。最令四哥嬲豬係，走嗰時，曾江仲同佢講：「四哥，車埋我！」氣得四哥怒道:「我車佢老母，我怕佢乜，佢再講一次，我話唔X車，X你老味！」整個電話訪問中，四哥7度爆粗「我X你老母！」

經過噚日俾曾江一氣，四哥自言返到去成晚瞓唔著。四哥接受本報電話訪問時說:「頂住度氣，諗住今日記者會落你面，結果去到嚇死我，原來好多高層喺度，結果我梗係唔會做啲咁戇居嘢，等佢哋走咗，我同記者講，我預備兜心打佢，阿修喺中間攔住我，我打佢一巴就算，我心都唔安落唔願意㗎，跟住走咗。」

事發時電光火石間，大家亦來不及俾反應。被摑後曾江有何反應？四哥表示:「佢猛話唔係唔係囉！嚇！我真係頂你唔順，唔係淨係坐輪椅嗰嚇呃我哋，好多嘢我唔可以講出嚟，講出嚟好似八卦婆，呢條友我識佢幾十年，喺台灣我哋成班人排擠佢，唔同佢玩，我忍耐力幾好，忍咗佢十幾廿日。（下咗啖氣未）下咗少少（怕唔怕曾江追究？）歡迎佢追究。」睇番片段，四哥摑曾江時，令曾江助聽器飛脫。

四哥離場後，過咗海去四季酒店歎茶。約晚上近七時，四哥走人，見佢已經下咗啲火:「呢個人唔係咁樣對佢唔得，佢以為個個都可以恰，嗰啲工作人員梗係俾你恰到，但係我唔得0架。(你覺得係佢度橋出嚟？)我喺錄音室配音佢窒我，我噚日已經想打佢，不過喺無綫嘅地方我唔打，OK，係咁喇！」

無綫強調謝賢摑曾江唔係宣傳奇招

無綫企業傳訊部副總監曾醒明，接受電話訪問時，談到謝賢發火向曾江郁手一事，他表示由於事出突然，故不知當時發生甚麼事，故已建議節目監製聯絡謝賢，不過到現時仍未接觸到對方。

問到今次事件是否宣傳手法之一，曾醒明鄭重澄清指，無綫向來宣傳節目都是著重內容及特色，不會以這些奇招作為宣傳技倆。曾醒明亦表示：「謝賢同曾江喺圈中都係甚有地位，而且又唔係無綫合約演員，就算有咁嘅諗法，佢哋都唔會。」

謝賢唔想再見到曾江：當識少個人

曾江笑稱等謝賢道歉電話，就此記者致電謝賢，不過他聽完即再發火謂：「等我電話？叫佢等我入棺材嗰日啦！（仲好勞氣？）梗係勞氣啦，見過我發火未呀？佢實在要懲戒，以為不可一世，唔得咁架嘛，拍攝時我已經忍氣吞聲，但配音嗰陣，佢好唔畀面我，話我拖累佢，佢喺導演、監製面前咁樣，我仲使撈嘅？（鬧你乜嘢？）自《三個小生去旅行》後，我兩年幾冇錄過音，佢就成日都錄音，如果我成日錄都快啦！讀稿時，佢話『X！本來想早啲返去，依家都未返！』，我叫佢咪嘈，佢仲教我讀稿！之後，佢又唔耐煩行來行去，本來都想打佢架喇，但因為喺TVB，第二打佢點配音先？錄完音走嘅時候，佢仲叫我車佢返屋企，我話唔得就走咗。」謝賢又謂入行60年來首次遭受侮辱。

謝賢又大爆到俄羅斯取景期間，一直患有痛風的曾江稱腳痛，每次拍畢對方即跳上輪椅，又經常要求工作人員推車，他說：「喺俄羅斯冇人敢出聲，推車嗰個只係做research，無理由要人由朝推到晚，仲要受佢（呼）喝。（你有幫手出聲？）當時我冇出聲，唔可以搞事，因為一定亂，我一路都忍，都知道佢啲嘢。」

他又續說：「痛風唔會一路痛，唔使一拍完就跳上車，有日佢做主角煮嘢，佢企足兩粒鐘都冇事、冇嗌痛，所以分明係扮嘢、擺款，佢仲成日諗住擋人鏡頭，有本事你就唔好壓住人啦！」並謂雙方認識多年，卻一直沒有來往，更怒斥謂：「佢啲衰嘢一路都冇改！」

問到會否跟對方再合作？謝賢說：「見都唔想見！（之後仲有宣傳活動？）有，17號我請食飯睇首播，佢敢嘅咪嚟囉！（你會請佢？）我唔會出聲，總之佢敢咪嚟囉。」談到無綫高層余詠珊有意擺和頭酒，他說：「冇得和頭，當識少個人，佢又唔係我好友。」對於胡楓解釋曾江純粹扮嘢，問到對方是否講笑而惹來誤會？謝賢說：「講笑還講笑，真假我分唔到咩，講笑會即刻解釋，我同胡楓都有講笑。」

謝賢曾爆粗口催Joe Junior

TVB搞呢個《4個小生去旅行》，其實請來「老馬有火」嘅謝賢過往已經引起唔少話題，好似上一次《3個小生去旅行》，已經有人喺網上流出佢哋三個老人家去外國拍攝時，謝賢真性情流露以粗口催促Joe Junior上車話:「上啦上啦，X你老X快啲吖嘛！」當時片段於網上瘋傳，最後呢條當然冇喺電視播出啦，但謝賢「好火」真係眾所周知，以往佢同記者做訪問，口頭禪係:「你信唔信我一巴打到你癡埋牆。」當然，係笑住咁講嘅。

其實謝賢由上次《3個小生》去到今次《4個小生》，啲火都冇收過，今次《4個小生》去到俄羅斯咁遠拍外景，嗰陣問到謝賢，佢已經有「微言」話推咗坐輪椅嘅曾江幾日，仲話打咗佢幾槌。而曾江就話係因為痛風發作，所以腳痛要坐輪椅，仲笑言:「有人推點解要行。」當時謝賢被問到有冇喺節目爆粗，佢仲扯火反問記者:「問埋呢啲嘢，你都short short哋。」