謝賢怒摑曾江令《4個小生去旅行》收視破紀錄

謝賢（四哥）、曾江、胡楓（修哥）及Joe Junior參與的節目《4個小生去旅行》昨晚首播，首集平均及最高收視皆錄得26點，約168萬觀眾收看。成功突破2013年播出的《3個小生去旅行》首集平均收視23點，最高25點的記錄，更成為2015年10點半檔收視最高節目。謝賢上周在記者會中怒摑曾江，惹來全城熱烈討論，猜測兩人是不和還是宣傳招數，不管是不是都已經為節目帶來宣傳效果。另外，8點半檔劇集《樓奴》則有平均26點，9點半劇集《拆局專家》則有平均27點。

對於收視理想，無綫電視企業傳訊部副總監曾醒明表示：「感謝4位小生節目內咁落力，上星期記者會都瞓身力谷，雖然否認了謝賢怒摑曾江事件是宣傳，但的確收到話題，令觀眾期待。（搞宣傳活動撮合4位？）宣傳立場上當然想乘勝追擊，係傾緊嘅，但幕後都有好多後期工作要做，而且要夾番4位嘅檔期。」

節目監製蘇敏儀則說：「都係平常心，係開心嘅，之前會覺得10點觀眾都瞓咗覺，唔想畀大家壓力，依家努力咗，成績好當然開心。」謝賢受訪時大讚厲害，又希望收視繼續向好：「咁犀利？（睇咗未？）未睇，不過網上好易睇番！（滿意首集成績？）希望繼續好落去！（期望收視衝到30點？）冇期望呀，大家鍾意就得，最緊要觀眾滿意！」