14年前倉底貨出土 亞視新劇《大地遺孤》首播

【離巢小生】陳寶轅曾是亞視力捧小生，與龐秋雁在劇中演一對日本夫婦。

趁抗戰勝利70年硬推

據了解，原來亞視因多番易手，這部劇被存放倉底並被遺忘，現已過檔nowTV的《大地遺孤》監製賀誌良昨說：「我喺亞視監製過《尋找他鄉的故事》，之後離開亞視自己搞製作。嗰時ATV又想要節目，反正我哋有呢啲個案古仔，所以就設計咗呢個docudrama（紀實電視劇），ATV外判畀我哋做。」

對於亞視遲了14年才推出，賀誌良說：「我當年係封小平年代傾，好似拍完冇幾耐亞視就易手，可能易手之後有啲混亂，有人唔知道拍咗呢嚿嘢。」賀誌良指早前跟亞視執行董事葉家寶聯絡，對方不知道有此劇集，獲悉後便決定趁抗戰勝利70周年這段時間內推出。

記者昨致電蔡國威，他亦忍不住笑說：「當年我好嫩口係嘛！好坦白講，唔記得有呢套劇存在。其實幾好吖，可以重見天日，遲係遲咗啲，遲咗14年，但好記得當年大家好畀心機去做，隔咗14年之後，見到好多周遭朋友同網上討論區朋友都話好睇，話好耐冇追亞視劇集，又話感動到眼濕濕。希望公司見到反應好，拿拿聲開番套劇集，唔好隔咗10幾年先有套劇集出現啦！」

龐秋雁：亞視乜都做得出

當年主演劇中《班忠義與曾大媽》單元的龐秋雁，昨日極度驚訝說：「係咩？唔係嘛？好搞笑呀，竟然可以出街！亞視真係乜都做得出！呢個戲我由17歲做到67歲，對我嚟講幾有滿足感！呢個係我喺亞視最後拍嘅戲，雖然資源好少，但我都好畀心機去做。」

對於14年前劇集延至現在才播出，亞視發言人昨解釋：「因為節目上安排，所以一直未有播出，因為今年係抗戰勝利70周年，所以將相關節目播出。」其實《大地遺孤》先後到內地和日本拍攝外景，劇中本有多個單元故事，但亞視只抽選其中兩個單元播出，認真「嘥料」。

【當年今日】劇中演員去咗邊？

亞視於上月31日，播出14年前拍的新劇《銘記歷史：大地遺孤》，劇中演員你又認得多少？他們的近況又如何？

蔡國威
「六合彩之子」蔡國威，加入亞視20年，因無綫取得播放權，已不能再主持六合彩，近日仍與亞視另簽新約。

龐秋雁
曾是亞視花旦的龐秋雁，於2002年離開亞視後開始淡出娛樂圈，現於浸會大學教授表演課程。

張國權
於《我和殭屍有個約會》飾演殭屍仔「況復生」，也有份演出《大地遺孤》，現年26歲的他去年成家立室。

陳寶轅
現以藝名陳保元在內地發展，2006年與拍拖5年的圈外女友Yvette結婚。

鍾慧寧
有肥豹之稱的鍾慧寧，2002年被亞視裁走，開始患有情緒病，去年於長安邨寓所自殺死亡。

冼灝英
大聖劈掛高手冼灝英，曾效力亞視、無綫，大前年轉投王維基的港視，去年5月重投無綫。

【故事簡介】《大地遺孤》講啲乜？

《大地遺孤》是亞視2001年的作品，是混合資訊和實況戲劇形式的節目，共分五個單元，單元的故事圍繞日本戰後遺孤在中國成長的故事，攝影隊深入中國東北及日本實地拍攝，追訪遺孤家庭。但亞視這次只會播出其中兩個單元，包括《班忠義與曾大媽》和《郭鳳祥（莊山紘宇）》，《班忠義與曾大媽》的單元中，參考班忠義的著作《曾大媽的海》，《曾》更獲得日本朝日周刊的報告文學大賞。

而《郭鳳祥（莊出紘宇）》單元則講述郭鳳祥小時候隨父由日本到中國東北開辦農業訓練班，後來父親被強徵入伍，年幼的郭鳳祥和家人四處逃難，直至十多年後，才得與妹妹重聚。