78歲獨居老戲骨夏萍入院 家中跌倒逾10小時無人知

人稱Apple姐的78歲無綫資深演員夏萍，昨日上午在淘大花園家中不小心跌倒，據知Apple姐教唱歌的老公張雲91年去世之後，一直一個人生活，同前夫生的一仔一女好少聯絡，加上平日只是請鐘點工人打掃，所以在家中跌倒都無人知。

Apple姐在家中跌倒之後不能動，直至昨晚8點左右，無綫藝員部打電話想問候一下她，Apple姐才說自己跌倒，同事於是即刻打電話call白車，將Apple姐送院救治。據知Apple姐照了X光之後無骨折，但身體多處有瘀傷，目前仍然要留院觀察。

今日有人在醫院見到Apple姐，見她精神都OK，但就心情似乎麻麻，姑娘幫她量血壓，她有點不耐煩說：「又量？」跟住Apple姐就不停打電話，說好似會落雨，自己不記得關窗，叫人幫她關家中的窗。

林家棟係Apple姐嘅契仔，兩個人相識20年，關係親如母子。家棟今日接受訪問時，話今日無綫一位化妝師打俾佢，先知契媽入咗醫院。佢話：「我都係今日先知佢入咗院，其實我一直好擔心佢一個人住，之前原本安排咗佢入老人院，有專人睇住佢，我會放心啲，原本佢答應入，但後來又改變主意，話想再演多一年戲，咁佢想做戲，我都冇得迫佢，但佢一個人住，再有乜閃失就麻煩，我諗住等佢出院，幫佢請個工人，可以日日貼身照顧佢，咁我就放心好多。」

Apple姐已故老公張雲在生時係教唱歌，梁健平係徒弟，張雲過身之後，梁健平一路都有份睇住師母。今日打畀梁健平，問佢知唔知Apple跌親入院，佢話:「我噚晚收工時大慨8點接到個電話，話Apple姐喺屋企跌親，跌親時間都好長，由朝早挨到夜晚，有人打電話比佢，佢先至話跌親，坐咗喺屋企郁唔到，我知道就即刻撲過去，佢TVB同事call白車，基本上白車同我同步到現場，一齊上樓接佢去醫院。」

咁究竟Apple姐而家情況點？梁健平話:「初步照X光冇骨折，尾龍骨有瘀有腫，其他暫時唔係有乜大礙，我中午都探過佢，佢還可以食飯，精神狀況還可以。佢下午再照膝頭哥，因為佢行動唔方便，可能做個詳細檢查先知大慨情況。」

咁究竟係乜嘢原因跌親？梁健平話:「唔知架，老人家可能失平衡或者失暈跣一跣，好彩唔係個頭著地，係pat pat著地，所以『蹬』親尾龍骨。老人家跌一跌可大可少，所以我叫個同事即刻call白車，可能佢自己有啲驚同擔心，call咗白車去醫院做個檢查，我哋都安心啲。」

梁健平話師母一個老人家獨居比較擔心，佢自己爸爸就係今年5月跌親，之後過咗身，所以老人家跌倒真係唔可以掉以輕心，尤其是屋企有老人家係一個人住嘅話，真係要睇緊啲至得！

7夏萍：冇大礙，跌親隻腳之嘛

Apple姐表受電話訪問，聲音好響亮說：「我跌倒當然要入院啦。」有無大礙？她說：「沒大礙，跌傷腳而已。」幾時出院？Apple姐說：「昨晚才進來。」照過曬X光？「照過啦。」接下來要開工嗎？Apple表示：「我沒有戲拍。」

剛從新加坡返港的高層樂易玲表示已向藝員部同事了解，指該同事住在夏萍附近，不時會致電她問候，剛巧前日打電話給她時，夏萍指自己剛剛跌倒感覺痛，同事便立即聯絡夏萍徒弟梁健平一同上門，雖然夏萍家中設有平安鐘，但她說：「她覺得自己捱到，所以無用到。」樂小姐強調並非無人理她，同事們經常會關心她，又透露剛與夏萍聊過電話，對方亦希望能盡快出院。